خميس شعبان عبد الرحيم: الترزي فاجئني أن بدلتي

خميس شعبان عبد الرحيم: الترزي فاجئني أن بدلتي
(اخر تعديل 2024-03-21 17:21:59 )
بواسطة

كشف الفنان خميس شعبان عبد الرحيم، تفاصيل أزمته مع الترزي بسبب بذلة بـ 20 ألف جنيه، بجانب الحديث عن أزمته مع نقابة المهن الموسيقية، ورأيه في مطربين المهرجانات الشعبية.

وقال خميس شعبان عبد الرحيم، في لقائه مع الإعلامية إنجي هشام، في برنامج "المنسي"، المذاع عبر شاشة قناة "هي": عملت بدلة بـ 20 ألف جنيه، مصر كلها اتكلمت على البدلة وهي فيها الناس القديمة كلها، كل الناس اللي ماتوا واللي عايشين موجود صورهم على البدلة، وجيت أدي له 5 آلاف جنيه، قالي لأ دي بـ 20 ألف، وإديته 15 ألف قالي والله هاخد 20 ألف، قولتله والله ما هتاخد، لغاية ما الدنيا اتقلبت علينا والصحافة والتليفزيون، ومدتلوش لغاية دلوقتي الـ 5 آلاف جنيه، ومش هديهم له.

أما عن أزمته مع نقابة المهن الموسيقية، فقال خميس شعبان عبد الرحيم: أنا عملت اختبارات نقابة المهن الموسيقية ونجحت، ومعايا كارنيه النقابة، وده أهم حاجة عندي وده شغلي وأكل عيشي، ولو مش معايا الكارنيه مش هعرف أأكل عيالي ولا أصرف عليهم.

وتابع: أنا معرفش ليه النقابة نفت أني خدت الكارنيه، هما يعملوا اللي يعملوه وأنا المهم عندي أني نجحت ومعايا الكارنيه وشغال بيه، وبروح الأفراح وبيجيلي بتاع النقابة وبدي له الفلوس اللي بيطلها.

وأضاف: أحلى كلام بيعمله عم مصطفى، بس في شباب طالع كده لو غلط اعدي له مرة وأقرص ودنه، ولو غلط تاني أوقفه خالص، مع أنه محذر من قبل ما أي حد يغني كلام خارج.

وعن رأيه في مطربين المهرجانات: أنا ماليش في المهرجانات خالص، بس بحب كل الشباب اللي بتغني زي حمو بيكا وعصام صاصا مكنتش بحبه ولا بسمعه ولكن في أغاني له حلوة، وأي مطرب في مصر ينجح بالطريقة دي أنا بفرح ليه أوي علشان هو من مصر، وفي مطربين كتير مكنوش معروفين ولما جم مصر اتعرفوا وبقى مالهمش وصف، ولما مطرب شاب زي عصام صاصا العالم كله عارفه أبقى فرحان بيه، وبحب أحمد مكي بس في الراب علشان دي شغلته، ومعرفش ويجز بيقول إيه.

وبرنامج المنسي، من تقديم الإعلامية إنجي هشام على شاشة قنا هي، ويُعرض يوميًا في تمام الساعة العاشرة مساءا، طوال شهر رمضان، ويحل عدد من نجوم الفن ضيوفًا على برنامج المنسي، للحديث عن بدياتهم وتفاصيل مشوارهم وتفاصيل التحديات التي واجهتهم على مدار مشوارهم الفني.